برطانیہ: دہشت گردی سے متعلق گرفتاریوں میں ۶۶۰؍ فیصد اضافہ

برطانیہ: دہشت گردی سے متعلق گرفتاریوں میں ۶۶۰؍ فیصد اضافہ

برطانیہ میں دہشت گردی سے متعلق گرفتاریوں میں ایک سال کے دوران غیر معمولی طور پر تقریباً ۶۶۰ فیصد اضافہ ریکارڈ کیا گیا ہے۔ سرکاری اعداد و شمار کے مطابق ستمبر ۲۰۲۵ء تک ۱۸۸۶ افراد گرفتار ہوئے، جبکہ گزشتہ سال یہ تعداد ۲۴۸ تھی۔ اس اضافے کی بنیادی وجہ جولائی ۲۰۲۵ء میں فلسطین ایکشن کو کالعدم دہشت گرد تنظیم قرار دیا جانا ہے، جس کے بعد ہونے والی گرفتاریوں میں ۸۶ فیصد اسی گروپ سے منسلک بتائی گئیں۔

پابندی کے نفاذ کے بعد صرف تین ماہ (جولائی تا ستمبر ۲۰۲۵ء) میں ۱۷۰۶ گرفتاریاں ہوئیں، جو پچھلی سہ ماہی کے مقابلے میں کئی گنا زیادہ ہیں۔ فلسطین ایکشن سے غیر متعلق گرفتاریوں میں اضافہ معمولی رہا۔ رپورٹ میں بچوں اور خواتین کی گرفتاریوں میں اضافے، کم شرحِ فردِ جرم، اور گرفتاریوں کے عمرانیاتی رجحانات کی بھی نشاندہی کی گئی ہے۔

ادھر فلسطین ایکشن کی شریک بانی نے اس پابندی کے خلاف قانونی کارروائی شروع کر رکھی ہے۔ ایک آزاد سرکاری جائزے میں خدشہ ظاہر کیا گیا ہے کہ دہشت گردی کے قوانین کا اطلاق حد سے زیادہ وسیع انداز میں ہو رہا ہے اور قانونی تعریف میں ابہام پایا جاتا ہے۔