هندوستان: کالج میں برقعہ پر پابندی کے خلاف طالبات کا احتجاج، بھوک ہڑتال
هندوستان: کالج میں برقعہ پر پابندی کے خلاف طالبات کا احتجاج، بھوک ہڑتال
ممبئی: بھارت کے گوریگاؤں ویسٹ کے ویویک ودیالیہ اینڈ جونیئر کالج میں برقعہ پہننے پر عائد پابندی کے خلاف احتجاج میں مزید شدت آگئی ہے۔
مقامی میڈیا رپورٹس کے مطابق گزشتہ روز بڑی تعداد میں طالبات نے کالج کے باہر بھوک ہڑتال شروع کی، جس میں مجلس ویمنز ونگ کی نائب صدر جہاں آرا شیخ بھی شریک ہوئیں اور کالج انتظامیہ سے برقع پابندی فوری طور پر ختم کرنے کا مطالبہ کیا۔
رپورٹس کے مطابق جہاں آرا شیخ کا کہنا تھا کہ کالج انتظامیہ نے پہلے بات چیت کا موقع نہیں دیا اور انہیں کالج احاطے میں داخل ہونے سے روک دیا گیا۔ انہوں نے کہا کہ احتجاج مقصد نہیں تھا، بلکہ صرف یہ مطالبہ تھا کہ طالبات کی تعلیم متاثر کئے بغیر ان کے مذہبی حقوق کا احترام کیا جائے۔
طالبات کے مطابق داخلے کے وقت انہیں برقع پابندی سے متعلق کوئی اطلاع نہیں دی گئی تھی، اس لیے پابندی کو اچانک نافذ کرنا غیر مناسب عمل ہے، نائب پرنسپل نے پرنسپل سے ملاقات کا وقت دیا تھا لیکن ملاقات کے لئے پہنچنے پر گیٹ بند کر دیئے گئے اور اندر داخل نہیں ہونے دیا۔
دوران احتجاج پولیس نے ممبئی مجلس صدر حاجی فاروق بھائی شابدی کو حراست میں لے لیا، احتجاج میں شامل قائدین اور طالبات کا کہنا ہے کہ برقعہ پابندی طالبات کی مذہبی آزادی اور بنیادی حقوق کی خلاف ورزی ہے جو ناقابل قبول ہے۔
مظاہرین نے واضح کیا ہے کہ جب تک کالج انتظامیہ برقع پابندی کے فیصلے پر نظرِ ثانی نہیں کرتی، احتجاج اور بھوک ہڑتال جاری رہے گی۔
