ماسکو میں حسینیہ سجادیہ میں ایام عزائے فاطمی میں مجالسِ عزا منعقد
ماسکو میں اہلِ بیت علیہم السلام کے پیروکاروں نے حسینیہ سجادیہ میں عزائے فاطمی کی مناسبت سے نہایت عقیدت و احترام کے ساتھ مجالسِ عزا برپا کیں۔
یہ مجالس روس میں مقیم شیعہ برادری اور عاشقانِ اہلِ بیت علیہم السلام کی بڑی تعداد کی شرکت سے منعقد ہوئیں۔
شیعہ خبر رساں ایجنسی کے مطابق، ان مجالس میں رسولِ خدا صلی اللہ علیہ وآلہ کی شہادت کے بعد خاندانِ نبوت پر ہونے والے مظالم بالخصوص حضرت فاطمہ زہرا سلام اللہ علیہا پر گزرنے والے مصائب کو یاد کیا گیا، جو تاریخِ اسلام کے نہایت دردناک اور غم انگیز ابواب میں سے ہیں۔
شرکت کرنے والوں نے گہرے رنج و غم کے ساتھ ان ایام کی تعظیم کی اور اس راستے پر ثابت قدم رہنے کے اپنے عزم کا اظہار کیا جو حضرت زہرا سلام اللہ علیہا نے اپنی زندگی سے امت کے لئے واضح فرمایا — یعنی حق، استقامت اور ہر حال میں خاندانِ رسالت علیہم السلام کی اقدار سے وفاداری کا راستہ ہے۔
مجالس عزا کے منتظمین نے واضح کیا کہ یہ پروگرام ماسکو کی شیعہ کمیونٹی کی جانب سے ہر سال منعقد ہونے والی روایت کا تسلسل ہے، جس کا مقصد حضرت زہرا سلام اللہ علیہا کی مظلومیت کو زندہ رکھنا ہے۔
یہ سلسلۂ مجالس نہ صرف اُن پر ڈھائے گئے ظلم کی یاد دہانی کا موقع ہے بلکہ آئندہ نسلوں کے دلوں میں اہلِ بیت علیہم السلام سے محبت اور روحانی تعلق کو مضبوط کرنے اور خاندانِ پیامبر کے اصیل پیغام کو دنیا تک پہنچانے کا ذریعہ بھی ہے۔
منتظمین نے اس امر کی جانب اشارہ کیا کہ ان ایام کی تعظیم ایک عالمی پیغام بھی ہے، جو پیروانِ اہلِ بیت علیہم السلام کی ثابت قدمی اور حضرت فاطمہ زہرا سلام اللہ علیہا سے تجدیدِ عہد کی علامت ہے— وہ عظیم خاتون جن کی سیرت عدل و انصاف کے قیام اور ظلم و ستم کے خلاف استقامت کی لازوال مشعل راہ ہے۔
