بین الاقوامی علامہ نائینی کانفرنس کا نجف اشرف میں آغاز؛ 40 جلدوں پر مشتمل دانش نامہ کی رونمائی
نجف اشرف میں محقق میرزا محمد حسین نائینی کے حوالے سے بین الاقوامی کانفرنس کی سرگرمیوں کا آغاز ہوگیا۔
شیعہ خبر رساں ایجنسی کے مطابق یہ کانفرنس آستانِ قدسِ حسینی، آستانِ قدسِ علوی اور نجف و قم کے دینی حوزات کے بعض علما و فضلائے کرام کے تعاون سے منعقد کی گئی ہے۔
افتتاحی تقریب نجف اشرف کے عظیم علوی ہال میں منعقد ہوئی جس میں حوزۂ علمیہ کے اساتذہ، ملکی و بین الاقوامی محققین اور تقریباً 500 علمی و دینی شخصیات نے شرکت کی۔
کانفرنس کے اہم ترین علمی کارناموں میں سے ایک محقق نائینی کے 40 جلدوں پر مشتمل عظیم دانش نامہ کی رونمائی ہے، جس میں سے 8 جلدیں مجمع امام حسین علیہ السلام کے تعاون سے مرتب کی گئی ہیں۔
اس کانفرنس کا بنیادی مقصد علامہ میرزا محمد حسن نائینی کی علمی شخصیت کو متعارف کرانا، ممتاز شاگردوں کی تربیت میں ان کے کردار کو اجاگر کرنا اور اہل بیت علیہم السلام کے علمی ورثے کی احیاء کے ضمن میں ان کی کوششوں کو نمایاں کرنا ہے۔
