پاکستان حکومت کی جانب سے غیر قانونی افغانی کی اطلاع پر انعام کا اعلان

پاکستان حکومت کی جانب سے غیر قانونی افغانی کی اطلاع پر انعام کا اعلان

پاکستان کے صوبہ پنجاب کی وزیر اطلاعات عظمیٰ بخاری نے غیر قانونی طور پر مقیم افغان اور دیگر غیر ملکی شہریوں کی اطلاع دینے پر نقد انعام دینے کا اعلان کیا ہے۔

ایک بیان میں عظمیٰ بخاری نے کہا کہ پنجاب میں غیر قانونی مقیم افغان اور دیگر غیر ملکی شہریوں کے خلاف آپریشن جاری ہے، اور غیر قانونی مقیم افغانیوں کی اطلاع دینے والوں کو نقد انعام دیا جائے گا۔

انہوں نے مزید بتایا کہ گزشتہ تین ہفتوں کے دوران 6,220 افغانیوں کو واپس ان کے ملک بھیجا گیا ہے۔

واضح رہے کہ 2002 سے 2005 کے درمیان افغان مہاجرین کی پہلی بڑی واپسی ہوئی تھی۔

طالبان حکومت کے خاتمے کے بعد 2001 میں اقوام متحدہ کے ادارہ برائے مہاجرین نے افغان مہاجرین کی واپسی کے لیے ایک رضاکارانہ پروگرام بھی شروع کیا تھا۔

2002 سے 2005 کے درمیان، تقریباً 30 لاکھ افغان مہاجرین پاکستان سے واپس افغانستان بھیجے گئے۔

2016 میں پاکستان نے نیشنل ایکشن پلان کے تحت افغان مہاجرین کی بڑے پیمانے پر واپسی کا اعلان کیا جس کے نتیجے میں 3 لاکھ 70 ہزار افغان مہاجرین واپس افغانستان گئے اور 8 لاکھ کو افغان سٹیزن کارڈ کا اجراء کیا گیا۔