عزائے فاطمی ظلم کے خلاف بیداری کی لہر پیدا کرتی ہے: مولانا سید رضا حیدر زیدی

لکھنو۔ شاہی آصفی مسجد میں 14 نومبر 2025 کو نماز جمعہ حجۃ الاسلام والمسلمین مولانا سید رضا حیدر زیدی صاحب قبلہ کی اقتدا میں ادا کی گئی۔

مولانا سید رضا حیدر زیدی نے نمازیوں کو تقوی الہی کی نصیحت کرتے ہوئے فرمایا: پروردگار ہمیں توفیق دے کہ ہمیشہ ہمارے دلوں میں تقوی رہے، اس سے ڈرتے رہیں اور اس کے احکام پر عمل کرتے رہیں۔

نماز غدیر کی جماعت کے مسئلہ کو بیان کرتے ہوئے مولانا سید رضا حیدر زیدی نے فرمایا: اس سلسلہ میں فقہاء کے 3 نظریے ہیں۔  کچھ نے جماعت سے پڑھنے کی اجازت دی ہے، کچھ نے منع کیا ہے اور کچھ نے توقف فرمایا ہے یعنی نہ حکم دیا ہے اور نہ ہی روکا ہے۔ ہر ایک کے پاس اپنی فقہی دلیل ہے۔ لہذا جو جس کی تقلید کرتا ہے اس کے فتوی پر عمل کرے۔

رسول اللہ صلی اللہ علیہ وآلہ وسلم کے خطبہ غدیر کا ذکر کرتے ہوئے مولانا سید رضا حیدر زیدی نے فرمایا: حضور نے پہلے اللہ کی حمد کی، اس کے بعد لوگوں کو وعظ و نصیحت فرمایا اور اس کے بعد امیر المومنین امام علی علیہ السلام کی ولایت کا اعلان کیا۔ جس سے واضح ہوتا ہے کہ منبر سے جہاں فضائل پڑھے جائیں وہیں وعظ و نصیحت بھی کی جائے۔

مولانا سید رضا حیدر زیدی نے فرمایا: منبر حق پہنچانے کا وسیلہ ہے۔ جس کے لئے فضائل بیان کرنا بھی ضروری ہے اور احکام بیان کرنا بھی ضروری ہے۔

مولانا سید رضا حیدر زیدی نے تاکید کرتے ہوئے فرمایا: منبر و محراب کو جدا کرنے سے گمراہی پھیلے گی اور جہاں جہاں گمراہی ہے اس کی وجہ بھی یہی ہے۔ جب منبرِ غدیر سے وعظ و نصیحت رسول اللہ صلی اللہ علیہ وآلہ وسلم نے فرمایا تو کون ہوتا ہے یہ کہنے والا کہ منبر سے صرف فضائل پڑھیں وعظ و نصیحت نہ کریں۔

ایام عزائے فاطمی کا ذکر کرتے ہوئے مولانا سید رضا حیدر زیدی نے فرمایا: سوال یہ ہوتا ہے کہ یہ عزائے فاطمی کیوں ضروری ہے؟ تو اس کے جواب میں عرض کہ ایام عزائے فاطمی ظلم کے خلاف بیداری کی لہر کو پیدا کرتے ہیں۔

عزائے فاطمی کے چند دیگر فوائد کا ذکر کرتے ہوئے مولانا سید رضا حیدر زیدی نے فرمایا: یہ ایام عورت کی عزت، وقار اور قدرت کو ظاہر کرتے ہیں۔ یہ ایام فرق و مذاہب میں اتحاد اور ہم آہنگی کا سبب ہیں۔ یہ ایام روحانی تربیت اور اصلاح نفس کا بہترین موقع ہیں۔ یہ ایام خدمت خلق کا بہترین موقع ہیں‌