گلاسگو کی مسلم کمیونٹی نے اس واقعہ کے بعد، جب شہر کی مرکزی مسجد کی دیوار پر “اسکاٹس فرسٹ” کا نعرہ لکھا گیا، اعلان کیا ہے کہ وہ کہیں نہیں جائیں گے اور وہ اسکاٹ لینڈ کے معاشرتی ڈھانچے کا ایک لازمی حصہ ہیں۔
“اسکاٹس فرسٹ” کا مطلب ہے “اسکاٹ لینڈ کے لوگ پہلے” یا “اسکاٹ لینڈ کے باشندے مقدم ہیں”۔ یہ نعرہ عموماً ان گروہوں یا افراد کی جانب سے استعمال کیا جاتا ہے جو چاہتے ہیں کہ تارکینِ وطن یا اقلیتی برادریوں کو سماجی خدمات، مواقع یا حقوق سے محروم رکھا جائے اور ترجیح صرف مقامی شہریوں کو دی جائے۔
درحقیقت یہ ایک امتیازی اور نفرت انگیز پیغام ہے جس کا مقصد معاشرے میں تفرقہ پیدا کرنا اور مسلمانوں سمیت دیگر مہاجرین کی موجودگی کو کمزور کرنا ہے۔
اسکاٹ لینڈ پولیس نے اس کارروائی کو “نفرت پر مبنی جرم” قرار دیتے ہوئے تحقیقات شروع کر دی ہیں۔
اسکاٹ لینڈ مساجد ایسوسی ایشن کے شعبہ تعلقاتِ عامہ کے ڈائریکٹر نے کہا کہ یہ واقعہ ملک میں مساجد کے خلاف ہونے والے متعدد تخریبی حملوں میں سے ایک ہے، جس کا مقصد مسلمانوں کو معاشرے سے الگ کرنا ہے۔
ڈاکٹر زبیر احمد، جو مسجد کے ایک پرانے نمازی ہیں، نے کہا کہ “گلاسگو کے بیشتر لوگ شریف النفس ہیں، یہ رویہ ان کی نمائندگی نہیں کرتا۔ ہماری ذمہ داری ہے کہ ہم ڈٹے رہیں اور اپنی آواز بلند کریں۔”
