مجالس عزائے فاطمی میں زیادہ سے زیادہ سیرت حضرت فاطمہ زہرا سلام اللہ علیہا بیان کی جائے: مولانا سید احمد علی عابدی

ممبئی۔ خوجہ شیعہ اثناء عشری جامع مسجد پالا گلی میں 31 اکتوبر 2025 کو نماز جمعہ حجۃ الاسلام والمسلمین مولانا سید احمد علی عابدی صاحب قبلہ کی اقتدا میں ادا کی گئی۔

مولانا سید احمد علی عابدی نے حضرت فاطمہ زہرا سلام اللہ علیہا کی عزاداری کی اہمیت اور ضرورت بیان کرتے ہوئے عزاداری کرنے والوں کی قدردانی کی اور مزید عزاداری کی تاکید کی۔

مولانا سید احمد علی عابدی نے یہ بتاتے ہوئے کہ اللہ کے یہاں کوئی تعصب یا پارٹی بازی نہیں ہوتی لہذا ایمان و عمل کے لحاظ سے جو مستحکم ہوگا وہی روز قیامت آگے ہوگا۔

روز محشر حضرت فاطمہ زہرا سلام اللہ علیہا کی عظمت کا ذکر کرتے ہوئے مولانا سید احمد علی عابدی نے فرمایا: قیامت کے دن اللہ تعالی نے جو درجہ اور عظمت حضرت فاطمہ زہرا سلام اللہ علیہا کو عطا کیا ہے وہ کسی اور کو عطا نہیں کیا کیونکہ کوئی اور ایمان و عمل کے حوالے سے ان کے برابر نہیں ہے۔

مولانا سید احمد علی عابدی نے زور دے کر لوگوں سے اپیل کی کہ آنے والے دنوں میں حضرت فاطمہ زہرا سلام اللہ علیہا کی مجلسوں میں زیادہ سے زیادہ حضرت فاطمہ زہرا سلام اللہ علیہا کی سیرت کو بیان کیا جائے اور کچھ اس طرح سے بیان کیا جائے کہ ہمارے گھروں میں قابل عمل قرار پائے۔

دور حاضر میں طلاق کی بڑھتی ہوئی شرح اور گھریلو اختلافات کا ذکر کرتے ہوئے مولانا سید احمد علی عابدی نے فرمایا: ہم حضرت فاطمہ زہرا سلام اللہ علیہا کا ذکر تو سنتے ہیں لیکن ہمارے ہاں فاطمی تہذیب پر عمل نہیں ہوتا بلکہ ہم مغربی تہذیب پر عمل پیرا ہیں اس لئے ہمارے یہاں یہ اختلافات ہو رہے ہیں۔

مولانا سید احمد علی عابدی نے وضاحت کرتے ہوئے فرمایا: ہم یہ نہیں کہتے کہ آپ ان کے ساتھ نہ چلیں، بے شک آپ ان کے ساتھ چلیں لیکن جن میدانوں میں انہوں نے ترقی کی ہے مثلا سائنس کے میدان میں آپ ان کے ساتھ چلیں لیکن اخلاقیات میں اسلام کے ساتھ رہیں۔