نیپال میں طوفانی بارش نے تباہی مچادی، 52؍افرادہلاک
نیپال میں طوفانی بارش نے تباہی مچادی، 52؍افرادہلاک
نیپال میں گزشتہ روز ہونے والی موسلادھار بارش اور لینڈ سلائیڈنگ نے ملک بھر میں نظام زندگی کو درہم برہم کردیا، سیلاب کے باعث 52؍ افراد ہلاک ہوگئے، طوفانی بارش کے بعد انتظامیہ نے اگلے 3؍ روز کے لئے تمام سڑکوں کو بند کردیا۔
میڈیارپورٹس کے مطابق نیپال گزشتہ 24؍ گھنٹوں سے مسلسل بارش کی زد میں ہے جس کی وجہ سے درجنوں مقامات پر لینڈ سلائیڈنگ ہوئی اور قومی شاہراہیں بند ہوگئیں۔
بارش کے سبب سیکڑوں گاڑیاں پھنس گئیں۔ انتظامیہ نے اگلے 3؍ دن کے لئے کٹھمنڈو آنے اور جانے پر پابندی لگادی ہے۔ عوام سے اپیل کی گئی ہے کہ وہ گھروں کے اندر رہیں اور باہر نہ نکلیں۔
بارش کے باعث ملک بھر کے ہوائی اڈوں کو بند کردیا گیا، تمام گھریلو پروازیں اگلے دو دنوں کے لئے معطل کر دی گئیں، کٹھمنڈو کا بین الاقوامی ایئرپورٹ بھی بند ہے جس سے مسافروں کو پریشانی کا سامنا ہے۔ تمام ملکی ایئرلائنز نے موسم بہتر ہونے تک پروازیں منسوخ کرنے کا فیصلہ کیا ہے۔
وزارت داخلہ نے کہا ہے کہ حکومت نے نیشنل ڈیزاسٹر مینجمنٹ اور اسپتالوں کے علاوہ تمام محکموں کے لئے چھٹی کا اعلان کیا ہے۔
سیلاب کے باعث ساحلی علاقوں کے مکینوں کو محفوظ مقامات پر منتقل کیا جارہا ہے، حکومت نے عوام سے مستعد رہنے، محفوظ مقامات پر رہنے اور گھروں سے نکلنے سے گریز کرنے کا مشورہ دیا ہے۔ تمام ہیلی کاپٹر کمپنیوں کو اسٹینڈ بائی پر رہنے کا حکم دیا گیا ہے۔
