روح انسانی کو اخلاق کی ضرورت ہے: مولانا صفدر حسین باقری
روح انسانی کو اخلاق کی ضرورت ہے: مولانا صفدر حسین باقری
جامعہ المنتظر نوگانواں سادات ہندوستان میں ہفتہ وار درسِ اخلاق کا انعقاد کیا گیا۔ جس میں مولانا صفدر حسین باقری استاد جامعہ نے طلابِ کو اخلاق کی اہمیت کی طرف متوجہ کرایا۔
مولانا نے اپنے خطاب میں کہا کہ جس طرح جسم کی نشوونما کے لئے غذا ضروری ہے، اس سے کہیں زیادہ انسان کی روح کو اخلاق کی ضرورت ہے۔ آپ نے مزید فرمایا کہ پیغمبر اکرم صلی اللّٰہ علیہ وآلہ وسلّم نے اپنی بعثت کا مقصد بھی اخلاق کو قرار دیا اور اللہ تعالیٰ نے حضور اکرم کی ذمہ داریوں میں تعلیمِ کتاب و حکمت سے پہلے تزکیۂ نفس کو ذکر کیا ہے۔
مولانا صفدر حسین باقری نے کہا کہ علم کی کمی کو اخلاق پورا کر سکتا ہے لیکن اخلاق کی کمی کو علم پورا نہیں کر سکتا۔ آپ نے طلاب کو نصیحت کی کہ نماز کو اول وقت میں باجماعت ادا کریں اور اخلاقی پہلوؤں میں سب سے پہلے اپنی زبان کی حفاظت کریں اور انضباطِ مدرسہ کا خاص طور پر خیال رکھیں۔
واضح رہے کہ مغربی یوپی کے معروف عالم و مبلغ مولانا سید نعیم عباس عابدی طاب ثراہ نے جامعۃ المنتظر قائم کیا جہاں سے اب تک سیکڑوں نوجوان علم و تربیت سے آراستہ ہو چکے ہیں۔
