آسٹریلیا :پھر طیارے میں آگ کی اطلاع پر ہنگامی لینڈنگ
آسٹریلیا :پھر طیارے میں آگ کی اطلاع پر ہنگامی لینڈنگ
آسٹریلیا کے دارالحکومت سڈنی سے آکلینڈ آنے والے ایک مسافر طیارے میں کارگو ہولڈ میں آگ لگنے کی اطلاع پر پائلٹ نے مے ڈے کال دی اور ہنگامی لینڈنگ کی درخواست کی۔
بین الاقوامی خبر رساں ادارے کی رپورٹ کے مطابق ایئر لائن حکام کا کہنا ہے کہ سڈنی سے آکلینڈ آنے والے مسافر طیارے میں 156 مسافر سوار تھے، تاہم خوش قسمتی سے جہاز نے آکلینڈ ایئرپورٹ پر بحفاظت لینڈ کرلیا۔
حکام کے مطابق ابتدائی تحقیقات سے معلوم ہوا ہے کہ فرنٹ کارگو ہولڈ میں آگ نہیں لگی تھی۔
ایئر لائن کے مطابق مسافروں اور عملے کی حفاظت اولین ترجیح ہے اور اس واقعے کی مکمل تحقیقات شروع کردی گئی ہیں۔
اس سے قبل امریکا کی بڑی فضائی کمپنی یونائیٹڈ ایئر لائن کو تکنیکی بحران کا سامنا کرنا پڑا جس کی وجہ سے ملک بھر میں سیکڑوں پروازیں اچانک روک دی گئیں۔
روئٹرز کے مطابق یونائیٹڈ ایئر لائنز نے کہا ہے کہ ٹیکنالوجی کے ایک مسئلے کی وجہ سے امریکی ہوائی اڈوں پر اس کی پروازوں کو چند گھنٹوں کے لیے روکا گیا تھا، انتظامیہ کا کہنا تھا کہ سسٹم میں اچانک تکنیکی خرابی واقع ہو گئی تھی، جس کے باعث فلائٹ آپریشن کو معطل کرنا پڑا۔
