اہل بیت علیہم السلام کے بتائے ہوئے راستے پر چل کر دنیا و آخرت کی فلاح حاصل کریں: آغا سید حسن الموسوی الصفوی
اہل بیت علیہم السلام کے بتائے ہوئے راستے پر چل کر دنیا و آخرت کی فلاح حاصل کریں: آغا سید حسن الموسوی الصفوی
رسول اللہ صلی اللہ علیہ وآلہ اور امام جعفر صادق علیہ السلام کی ولادت با سعادت کی مناسبت سے جموں و کشمیر انجمن شرعی شیعیان کے اہتمام سے امام باڑہ یال پٹن میں ایک شاندار محفل میلاد منعقد ہوئی، جس میں علمائے کرام نے سیرتِ رسول اکرم صلی اللہ علیہ وآلہ کے مختلف پہلوؤں پر روشنی ڈالی۔
محفل میلاد سے قبل ایک عظیم الشان جلوس میلاد صدرِ انجمنِ شرعی شیعیان حجۃ الاسلام والمسلمین آغا سید حسن الموسوی الصفوی کی قیادت میں سونیم سے برآمد ہوکر امام باڑہ یال پٹن میں اختتام پذیر ہوا۔
انجمن کے ذیلی حوزات علمیہ اور دینی مدارس میں زیر تعلیم ہزاروں طلبہ و طالبات کے علاوہ بڑی تعداد میں محبانِ اہلبیتؑ اور فرزندانِ توحید نے جلوس میں والہانہ شرکت کی۔
یہ پروقار تقریب پیغمبرِ اِسلام صلی اللّٰہ علیہ وآلہ اور امام جعفر صادق علیہ السلام کی عظیم المرتبت شخصیت کو خراجِ عقیدت پیش کرنے کے ساتھ ساتھ ان کے عالمگیر کو اجاگر کرنے کے لیے منعقد کی گئی۔
اس موقع پر صدر انجمن شرعی شیعیان حجۃ الاسلام والمسلمین آغا سید حسن الموسوی الصفوی نے محفل سے خطاب کرتے ہوئے کہا کہ رسول اکرم صلی اللّٰہ علیہ وآلہ کی سیرت اور امام جعفر صادق علیہ السلام کی تعلیمات عالمِ انسانیت کے لیے سرچشمۂ ہدایت ہیں۔
انہوں نے زور دیا کہ امت مسلمہ کو چاہیے کہ سیرتِ رسول اکرم صلی اللّٰہ علیہ وآلہ کو اپنی زندگی کا نصب العین بنائے اور ائمہ اہل بیت علیہم السلام کے بتائے ہوئے راستے پر چل کر دنیا و آخرت کی فلاح حاصل کریں۔
