عاشورا کا بنیادی پیغام تبدیلی ہے: مولانا سید رضا حیدر زیدی

عاشورا کا بنیادی پیغام تبدیلی ہے: مولانا سید رضا حیدر زیدی

لکھنو۔ شاہی آصفی مسجد میں 5 ستمبر 2025 کو نماز جمعہ حجۃ الاسلام والمسلمین مولانا سید رضا حیدر زیدی صاحب قبلہ پرنسپل حوزہ علمیہ غفرانمآب رحمۃ اللہ علیہ لکھنو کی اقتدا میں ادا کی گئی۔

مولانا سید رضا حیدر زیدی نے سنی علماء کو خطاب کرتے ہوئے فرمایا: جس طرح تبرے سے اہل سنت کو تکلیف پہنچتی ہے، ویسے ہی اگر کوئی جعلی اور جھوٹی روایت کو بنیاد بنا کر امیر المومنین امام علی علیہ السلام کے والد ماجد حضرت ابو طالب علیہ السلام کی شان میں گستاخی کرتا ہے یا یزید ملعون کو "رضی اللہ…۔۔” کہتا ہے تو ہمیں بھی تکلیف ہوتی ہے۔ لہذا ہماری گزارش ہے کہ اپنی قوم کو سمجھائیں اور وقت کے یزید اور عمر بن سعد کو پہچنوائیں، زمانے کا یزید وہ ہے جس کے ہاتھ پر تمہارے فقہاء نے بیعت کر رکھی ہے۔

مولانا سید رضا حیدر زیدی نے یہ بتاتے ہوئے کہ "عاشورا کا بنیادی پیغام تبدیلی ہے۔” فرمایا: 2 ماہ 8 دن ہم نے عزاداری کی، سوال یہ ہے کہ خود ہم میں کتنی تبدیلی آئی؟ اور کتنی دوسروں میں تبدیلی لانے کا سبب بنے؟

مولانا سید رضا حیدر زیدی نے شہید کربلا حضرت حر علیہ السلام کی مثال دیتے ہوئے فرمایا: انسان کا دو دن ایک جیسا نہیں ہونا چاہیے، تبدیلی کی سب سے بڑی مثال حضرت حر علیہ السلام ہیں۔ کچھ لمحوں میں فیصلہ کیا اور جنت کو حاصل کر لیا۔

مولانا سید رضا حیدر زیدی نے یہ بتاتے ہوئے کہ شہدائے کربلا اور اسیران کربلا کے تذکرے سے انسان میں تبدیلی پیدا ہوتی ہے، فرمایا: مراکش کے عالم و محقق جناب ادریس حسینی جو پہلے شیعہ نہیں تھے لیکن جب انہوں نے امام حسین علیہ السلام کی تاریخ پڑھی تو شیعہ ہو گئے اور کتاب لکھی "لقد شیعنی الحسین ‌علیه‌السّلام”

مولانا سید رضا حیدر زیدی نے تاکید کرتے ہوئے کہ امام حسین علیہ السلام لوگوں میں تبدیلی لاتے ہیں، فرمایا: معروف عالم و محقق شیخ محمد سلیم جب شیعہ ہوئے تو انہوں نے اپنے شیعہ ہونے کی یہ وجہ بتائی کہ "مجھے حضرت زینب سلام اللہ علیہا کے خطبوں نے شیعہ کر دیا کہ ایک ستم دیدہ خاتون کیسے اہل کوفہ کو للکار کر خطاب کر رہی تھیں۔ اسی خطبہ نے مجھے بدل دیا۔”