افغانستان ایک اور زلزلے کی زد میں، اموات کی تعداد 2 ہزار سے بڑھ گئی
افغانستان ایک اور زلزلے کی زد میں، اموات کی تعداد 2 ہزار سے بڑھ گئی
افغانستان کے جنوب مشرقی علاقوں میں گزشتہ رات ایک اور طاقتور زلزلہ آیا، جو چار دنوں کے دوران اس خطے کو لرزانے والا تیسرا جھٹکا ہے۔ جرمن ریسرچ سینٹر فار جیوسائنسز کے مطابق زلزلے کی شدت 6.2 ریکارڈ کی گئی، جس کا مرکز پاکستان کی سرحد کے قریب ضلع شیوہ تھا۔ زلزلے کی گہرائی 10 کلومیٹر بتائی گئی۔
ابتدائی رپورٹس کے مطابق برکش کوٹ کے علاقے میں نقصان کی اطلاعات موصول ہوئی ہیں جبکہ متاثرہ علاقوں سے مزید تفصیلات جمع کی جا رہی ہیں۔
سب سے زیادہ متاثرہ صوبے کنڑ اور ننگرہار ہیں، جہاں ہزاروں مکانات زمین بوس ہو چکے ہیں۔
طالبان حکام کے مطابق پچھلے 4 دنوں میں آنے والے تین زلزلوں میں اب تک 2 ہزار 205 افراد جان کی بازی ہار چکے ہیں جبکہ کم از کم 3 ہزار 640 افراد زخمی ہیں۔
ریسکیو ٹیمیں ملبے تلے دبے افراد کو نکالنے میں مصروف ہیں۔ جمعرات کو امدادی کارکنوں نے کئی لاشیں تباہ شدہ گھروں کے ملبے سے برآمد کیں جبکہ بے گھر ہونے والے لوگ کھلے آسمان تلے سخت حالات میں زندگی گزارنے پر مجبور ہیں۔
اقوام متحدہ اور دیگر عالمی اداروں نے خبردار کیا ہے کہ متاثرہ علاقوں میں خوراک، طبی امداد اور پناہ گاہوں کی فراہمی کے وسائل تیزی سے کم ہو رہے ہیں۔
ہزاروں متاثرین کی زندگیوں کو خطرات لاحق ہیں، جبکہ دور دراز علاقوں تک رسائی میں بھی شدید مشکلات درپیش ہیں۔
یاد رہے اتوار کے روز آنے والا پہلا زلزلہ شدت 6 کے ساتھ افغانستان کے حالیہ برسوں کے بدترین زلزلوں میں شمار کیا جا رہا ہے، جس سے کنڑ اور ننگرہار میں بڑے پیمانے پر تباہی ہوئی۔
اس کے بعد منگل کو 5.5 شدت کا دوسرا زلزلہ آیا، جس نے ریسکیو آپریشنز کو متاثر کیا اور پہاڑوں سے چٹانیں گرنے کے باعث کئی دیہاتی علاقوں سے رابطے منقطع ہو گئے۔
