افغانستان میں زلزلے نے شدید تباہی مچائی، جس کے نتیجے میں 800 افراد جاں بحق اور 2500 سے زائد زخمی ہوگئے۔ امریکی جیولوجیکل سروے کے مطابق زلزلے کی شدت 6.2 ریکارڈ کی گئی، جبکہ اس کا مرکز ننگرہار کے شہر جلال آباد کے قریب اور گہرائی 8 کلومیٹر تھی۔
زلزلہ مقامی وقت کے مطابق رات 11 بج کر 47 منٹ پر آیا، اور تقریباً 20 منٹ بعد اسی صوبے میں 4.5 شدت کا ایک اور جھٹکا محسوس کیا گیا، جس کی گہرائی 10 کلومیٹر تھی۔
افغان طالبان کے ترجمان ذبیح اللہ مجاہد نے سوشل میڈیا پر کہا کہ رات کے زلزلے کے باعث جانی و مالی نقصان ہوا ہے۔
مقامی حکام اور علاقے کے رہائشی متاثرہ افراد کی مدد اور امدادی سرگرمیوں میں مصروف ہیں، جبکہ مرکز اور قریبی صوبوں سے بھی امدادی ٹیمیں متاثرہ علاقوں میں ریسکیو اور بحالی کے کاموں میں حصہ لیں گی۔
واضح رہے کہ اسلام آباد، لاہور، پشاور، مردان،چکوال، ٹیکسلا اور واہ کینٹ میں بھی زلزلے کے جھٹکے محسوس کئے گئے تھے۔
زلزلہ پیما مرکز کے مطابق زلزلےکی شدت 6اور گہرائی 15 کلو میٹر ریکارڈ کی گئی جبکہ زلزلے کا مرکز جنوب مشرقی افغانستان میں تھا۔
