اسرائیلی فضائی حملے میں یمن کے حوثی وزیرِاعظم اور متعدد اعلیٰ حکام ہلاک

اسرائیلی فضائی حملے میں یمن کے حوثی وزیرِاعظم اور متعدد اعلیٰ حکام ہلاک

دی انڈیپنڈنٹ کے مطابق یمن کے حوثی وزیرِاعظم احمد غالب الرحوی ایک اسرائیلی فضائی حملے میں ہلاک ہوگئے جس کا نشانہ حوثی رہنماؤں کو بنایا گیا تھا۔ حوثی نیوز ایجنسی نے اس بات کی تصدیق کی ہے کہ کئی وزراء بشمول وزیرِخارجہ، وزیرِانصاف، وزیرِجوانان و کھیل، وزیرِسماجی امور اور وزیرِمحنت اس حملے میں مارے گئے ہیں۔

حوثی رہنما مہدی المشاط کے دفتر کے مطابق بعض وزراء شدید زخمی بھی ہوئے ہیں۔ اسرائیل نے کہا کہ یہ حملہ حوثیوں کے چیف آف اسٹاف اور وزیرِدفاع سمیت اُن کلیدی شخصیات کو نشانہ بنانے کے لیے کیا گیا تھا جو اسرائیل کے خلاف عسکری کارروائیوں کے ذمہ دار ہیں۔

اسرائیلی دفاعی افواج کے ترجمان نے بتایا کہ یہ کارروائی ایک تیز رفتار اور خفیہ معلومات پر مبنی حملہ تھا، جو صنعاء کے علاقے میں اُس کمپاؤنڈ پر کیا گیا جہاں اعلیٰ حوثی حکام موجود تھے۔ الرحوی تقریباً ایک سال سے وزیرِاعظم کے منصب پر فائز تھے اور انہیں زیادہ تر نمائشی شخصیت سمجھا جاتا تھا۔ اب اُن کے نائب محمد مفتاح کو اُن کے فرائض سونپ دیے گئے ہیں۔

اکتوبر 2023 میں غزہ جنگ کے آغاز کے بعد سے حوثیوں نے اسرائیلی بحری جہازوں پر حملے اور میزائل حملے کیے ہیں، جس کے جواب میں اسرائیل نے حوثی کنٹرول والے علاقوں پر فضائی حملے تیز کردیے ہیں۔ مہدی المشاط نے غزہ کے ساتھ اپنی حمایت کا اعادہ کرتے ہوئے اپنی فوجی صلاحیتوں کو مزید مضبوط بنانے کے عزم کا اظہار کیا۔