اسلام کسی بھی صورت غیرت کے نام پر قتل کی اجازت نہیں دیتا: علامہ احمد اقبال رضوی

‏اسلام کسی بھی صورت غیرت کے نام پر قتل کی اجازت نہیں دیتا: علامہ احمد اقبال رضوی

مجلس وحدت مسلمین پاکستان کے مرکزی رہنما علامہ احمد اقبال رضوی نے کہا ہے کہ بلوچستان میں ایک بے گناہ خاتون اور اس کے شوہر کو جرگے کے غیرشرعی فیصلے کے نتیجے میں قتل کر دینا ایک نہایت المناک، شرمناک اور انسانیت سوز سانحہ ہے، جس کی صرف قانونی نہیں بلکہ شرعی اور اخلاقی بنیادوں پر بھی شدید مذمت لازم ہے۔ انہوں نے کہا کہ ‏اسلام کسی صورت غیرت کے نام پر قتل کی اجازت نہیں دیتا۔ ‏جرگے کا یہ فیصلہ اور اس کے نتیجے میں کیا گیا قتل نہ صرف اسلامی تعلیمات بلکہ آئینی و قانونی ضابطوں کے بھی سراسر منافی ہے۔ ایسے جرگے اسلام کے عادلانہ نظامِ قضاء کی تضحیک ہیں اور فتنے و فساد کا ذریعہ ہے۔

علامہ احمد اقبال رضوی نے کہا کہ ‏میں اس وحشیانہ قتل کی شدید ترین الفاظ میں مذمت کرتا ہوں، ان قاتلوں اور جرگے کے تمام ذمہ داران کو فوری گرفتار کرکے انسدادِ دہشتگردی قوانین اور شریعت کی روشنی میں سخت ترین سزا دی جائے۔ انہوں نے کہا کہ غیرت کے نام پر قتل کے خلاف علماء کرام، دینی طبقات اور مذہبی ادارے واضح موقف اپنائیں اور امت کو اس فتنے سے بچائیں، خواتین کے نکاح، زندگی اور عزت کو قرآن و سنت کے مطابق قانونی تحفظ دیا جائے اور قبائلی و سرداری نظام کی غیر شرعی اجارہ داری ختم کی جائے۔