پاکستانی ہندو رکنِ پارلیمان: "حسین علیہ السلام صرف مسلمانوں کے نہیں، انسانیت کے ابدی رہنما ہیں”
پاکستانی ہندو رکنِ پارلیمان: "حسین علیه السلام صرف مسلمانوں کے نہیں، انسانیت کے ابدی رہنما ہیں”
ایک غیر معمولی اور قابلِ توجہ اقدام میں، پاکستان کے معروف ہندو رکنِ پارلیمان ڈاکٹر رامیش کمار وانکوانی – جو پاکستان ہندو کونسل کے سرپرست بھی ہیں – نے پاکستان کے مؤقر اخبار "انٹرنیشنل نیوز” میں ایک متاثر کن مضمون شائع کیا جس کا عنوان تھا: "روحانی قرابت”۔ اس مضمون نے میڈیا اور فکری حلقوں میں زبردست ردعمل کو جنم دیا۔
وانکوانی نے اپنے مضمون میں امام حسین علیہ السلام کی شخصیت اور کربلا کی عظیم قربانی کو صرف ایک مذہبی یا فرقہ وارانہ واقعہ ماننے سے انکار کرتے ہوئے اُسے ایک عالمی اور انسانی انقلاب قرار دیا۔ انہوں نے لکھا:
"امام حسین علیه السلام صرف مسلمانوں کے نہیں بلکہ ہر اس انسان کے ہیں جو حق و انصاف پر یقین رکھتا ہے۔”
انہوں نے زور دیا کہ کربلا کا واقعہ ایک انسانی بیداری کی علامت ہے جو ہر دور کے مظلوموں اور حریت پسندوں کو تحریک دیتا ہے۔
مضمون میں انہوں نے امام حسین علیه السلام کے ساتھ ہندو مذہب کے پیروکاروں کے جذباتی اور روحانی تعلق کا بھی ذکر کیا، اور "راجا دت” کی داستان بیان کی جو لاہور سے تعلق رکھنے والے ایک ہندو تھے۔ مقامی روایات کے مطابق، راجا دت نے اپنے سات بیٹے امام حسینؑ کے لیے قربان کیے، جس کے بعد ہندوستان میں "براہمن حسینی” نامی ایک جماعت قائم ہوئی جو کربلا کے اصولوں کی پیروکار ہے۔
مزید برآں، وانکوانی نے اس بات کی بھی نشاندہی کی کہ کچھ روایات امام زین العابدین علیہ السلام کی والدہ کا تعلق قدیم ہندوستانی شاہی خاندانوں سے جوڑتی ہیں، جو مشرقی تہذیبوں کے درمیان گہرے روحانی اور ثقافتی ربط کی علامت ہیں، جنہیں رسمی تاریخ اکثر نظر انداز کر دیتا ہے۔
انہوں نے یہ بھی لکھا کہ عراق کے شہر "ہندیہ” – جو کربلا کے قریب واقع ہے – آج بھی ان ہندو مجاہدین کی قربانیوں کی یادگار ہے جنہوں نے امام حسین علیه السلام کی حمایت میں اپنی جانیں نچھاور کیں۔ وانکوانی نے کہا:
"شاید ان کے خطوط دیر سے پہنچے، مگر ان کے دل کبھی دیر سے نہیں دھڑکے۔”
مضمون کے اختتام پر ڈاکٹر وانکوانی نے مذہبی رواداری اور انسانی بھائی چارے کی ایک جذباتی اپیل کرتے ہوئے لکھا:
"آئیے کربلا کو محض ایک مسلکی واقعے تک محدود نہ کریں۔ جو بھی اصولوں کے ساتھ کھڑا ہے، وہ حسینی ہے – چاہے اُس کا مذہب یا نسل کچھ بھی ہو۔ حسین علیه السلام انسانیت کا ضمیر ہیں، اور وہ ہمیشہ باقی رہیں گے، کیونکہ انصاف کبھی مرتا نہیں۔”
