ہندوستان کے 9 سالہ بچے نے ڈھائی سال میں اپنے ہاتھ سے پورا قرآن لکھ ڈالا
ہندوستان کے 9 سالہ بچے نے ڈھائی سال میں اپنے ہاتھ سے پورا قرآن لکھ ڈالا
قرآن پاک سے گہرے لگاؤ اور مستقل مزاجی کی ایک منفرد مثال پیش کرتے ہوئے، بھارت کی ریاست کیرالا کے 9 سالہ بچے محمد مدلاج نے ڈھائی سال کی مسلسل محنت کے بعد اپنے ہاتھ سے پورا قرآن مجید لکھ کر مکمل کر لیا۔
محمد نے اپنا یہ غیر معمولی منصوبہ دسمبر 2022 میں شروع کیا تھا جب وہ صرف 6 سال کا تھا۔ مقامی سطح پر 7 سال سے کم عمر بچوں کے ایک مقابلے میں شرکت کے بعد اس نے قرآن پاک کو خود لکھنے کا فیصلہ کیا۔ اس نے پنسل اور A4 سائز کے کاغذات استعمال کرتے ہوئے عربی خطاطی اور حرکات کی درستگی کا خاص خیال رکھا۔
بچے نے اس کام کے لیے روزانہ ایک گھنٹہ مختص کیا، جبکہ اس کے خاندان نے بھرپور تعاون کیا۔ اس کی والدہ نے تحریر کی نگرانی اور غلطیوں کی اصلاح کی ذمہ داری سنبھالی، یہاں تک کہ 26 مئی 2025 کو قرآن مجید کی کتابت مکمل ہو گئی۔
نص کی درستگی کو یقینی بنانے کے لیے، لکھے گئے قرآن کی ایک اجتماعی نظرثانی کی گئی جس میں متعدد حفاظ اور حافظات نے حصہ لیا۔ دو ماہ تک قرآن کے مختلف پاروں کو بار بار چیک کیا گیا تاکہ یہ یقینی بنایا جا سکے کہ لکھا گیا متن معیاری مصحف کے مطابق ہے۔
محمد کے اس کارنامے نے مقامی اور بین الاقوامی سطح پر بہت تعریف و تحسین حاصل کی ہے۔ اسے اسلامی دنیا کے نوجوانوں کے لیے ایک متاثر کن مثال قرار دیا جا رہا ہے، جو کم عمری میں قرآن پاک کے ساتھ عملی تعلق قائم کرنے، اسے حفظ کرنے، لکھنے اور سمجھنے کی ترغیب دیتی ہے۔
