عاشورا کے موقع پر راہل گاندھی اور کھڑگے کا پیغام- "امام حسین علیه السلام کی قربانی ہر دور کے لئے مشعل راہ”
امام حسین علیه السلام کا راستہ ہر اس شخص کے لئے ہے جو ناانصافی کے خلاف کھڑا ہونا چاہتا ہے: راہل گاندھی
عاشورا کے موقع پر راہل گاندھی اور کھڑگے کا پیغام- "امام حسین علیه السلام کی قربانی ہر دور کے لئے مشعل راہ”
یوم عاشورہ کے موقع پر ہندوستان کی اہم اپوزیشن جماعت کانگریس پارٹی کے لیڈران نے امام حسین علیه السلام کی قربانی کو یاد کرتے ہوئے ایک خصوصی پیغام جاری کیا ہے۔ انہوں نے اپنے آفیشل سوشل میڈیا اکاؤنٹس پر عاشورا کے تقدس اور امام حسین علیه السلام کی تعلیمات کو خراج عقیدت پیش کرتے ہوئے عوام سے قربانی، جدوجہد اور امن کے راستے پر چلنے کی اپیل کی ہے۔
یوم عاشورہ پر راہل گاندھی نے ایکس پر پوسٹ کرتے ہوئے کہا، ’’آج محرم کے دن ہمیں حضرت امام حسین علیه السلام کے بتائے ہوئے اس راستے پر چلنے کا عزم کرنا چاہیے جو جدوجہد، قربانی اور ایثار سے ہوتے ہوئے ہمیں انسانیت، امن اور اتحاد کی طرف لے جاتا ہے۔‘‘
راہل گاندھی کی اس پوسٹ میں امام حسین علیه السلام کی شہادت کو صرف مذہبی واقعہ نہیں بلکہ ایک عالمگیر پیغام قرار دیا گیا ہے، جو ہر عہد اور ہر انسان کے لئے مشعل راہ ہے۔ انہوں نے اس بات پر زور دیا کہ امام حسین علیه السلام کا راستہ ہر اس شخص کے لئے ہے جو ناانصافی کے خلاف کھڑا ہونا چاہتا ہے۔
اسی طرح کانگریس کے صدر ملکارجن کھڑگے نے بھی عاشورا کے موقع پر ایکس پر ایک پیغام جاری کیا۔ انہوں نے اپنی پوسٹ میں لکھا، ’’محرم کے دسویں دن عاشورا کے موقع پر ہم حضرت امام حسین علیه السلام کو خراج عقیدت پیش کرتے ہیں۔ ان کی مثالی زندگی، تعلیمات، راست بازی، ناانصافی کے خلاف بے خوف جدوجہد اور عظیم قربانی ہر دور میں گونجتی ہے اور نسل در نسل انسانوں کو متاثر کرتی ہے۔‘‘
ملکارجن کھڑگے نے بھی امام حسین علیه السلام کی جدوجہد کو ایک عالمی پیغام قرار دیتے ہوئے کہا کہ ان کی قربانی صرف مذہبی معاملہ نہیں بلکہ ظلم کے خلاف ایک ابدی اعلان ہے۔
