عراق میں محرم کے جلوسوں کو محفوظ بنانے کے لیے سیکیورٹی اقدامات میں اضافہ

عراق میں محرم کے جلوسوں کو محفوظ بنانے کے لیے سیکیورٹی اقدامات میں اضافہ
ماہِ محرم کے آغاز کے ساتھ ہی، عراق کی وزارت داخلہ اور بغداد آپریشنز کمانڈ نے بغداد، کربلا اور دیگر صوبوں میں عزاداریٔ حسینی کے جلوسوں اور مراسم کو محفوظ بنانے کے لیے وسیع سیکیورٹی منصوبے نافذ کر دیے ہیں۔
میڈل ایسٹ نیوز کی رپورٹ کے مطابق، عراق کے وزیر داخلہ عبدالامیر الشمری نے گیارہ سیکیورٹی ہدایات جاری کی ہیں، جن میں جلوسوں اور مجالس میں اسلحے پر مکمل پابندی، K9 ٹیموں کو فعال کرنا اور انٹیلیجنس سپورٹ کو مضبوط کرنا شامل ہے۔
عراقی سرکاری خبررساں ایجنسی (واع) کے مطابق، بغداد آپریشنز کمانڈ نے پولیس اور دیگر سیکیورٹی اداروں کے ساتھ مل کر ایک جامع منصوبہ تیار کیا ہے تاکہ موکبوں اور مذہبی مقامات کی حفاظت کی جا سکے اور ممکنہ خطرات کو پیشگی کارروائیوں کے ذریعے ناکام بنایا جا سکے۔
یہ تمام اقدامات عاشورائے حسینی کے عشرۂ اول میں زائرین اور عزاداروں کے سکون و سلامتی کو یقینی بنانے کے لیے کیے جا رہے ہیں تاکہ شہری آمدورفت میں خلل نہ پڑے اور مراسم پُرامن طریقے سے انجام پائیں۔