کربلا مقدسہ میں یومِ عرفہ پر امام حسین (علیہ السلام) کی مخصوص زیارت کی ادائیگی
اہلِ بیت (علیہم السلام) کے ماننے والوں کی بڑی تعداد نے عراق اور دیگر ممالک سے کربلا مقدسہ آ کر یومِ عرفہ پر امام حسین (علیہ السلام) کی مخصوص زیارت ادا کی۔ زائرین جمعرات کی شام سے ہی کربلا پہنچنا شروع ہو گئے تھے تاکہ اس عظیم عبادت کو انجام دے سکیں۔
مومنین ہر سال اس زیارت کو بہت اہتمام سے ادا کرتے ہیں، کیونکہ اہل بیت علیہم السلام کی بہت سی معتبر احادیث میں یومِ عرفہ پر امام حسین (علیہ السلام) کی زیارت کی فضیلت اور دعا کے قبول ہونے کا ذکر ملتا ہے۔
"شیعہ نیوز ایجنسی” کے نمائندے کے مطابق، عراق کے مختلف صوبوں اور عرب و اسلامی ممالک سے مومنین اس مستحب زیارت کو ادا کرنے کے لیے ہر سال کربلا کا رخ کرتے ہیں، کیونکہ روایات کے مطابق عرفات میں وقوف کرنے سے پہلے ہی امام حسین (علیہ السلام) کے زائرین کی مغفرت ہو جاتی ہے۔
اعلیٰ دینی مرجع، آیت اللہ العظمیٰ سید صادق الحسینی الشیرازی (دام ظلہ) نے بھی یومِ عرفہ کی عبادات اور امام حسین و حضرت عباس (علیہما السلام) کی زیارت کی اہمیت پر زور دیا ہے۔ اُن کے مطابق: "یومِ عرفہ پر اللہ تعالیٰ کی پہلی نظرِ رحمت کربلا میں امام حسین (علیہ السلام) کے زائر پر پڑتی ہے۔”
