غربت اور بے روزگاری کی بنیادی وجہ حکومتوں کی غفلت، نااہلی اور ناقص نظم و نسق ہے ؛ آیت اللہ العظمیٰ سید صادق الحسینی الشیرازی
غربت اور بے روزگاری کی بنیادی وجہ حکومتوں کی غفلت، نااہلی اور ناقص نظم و نسق ہے ؛ آیت اللہ العظمیٰ سید صادق الحسینی الشیرازی
آیت اللہ العظمیٰ سید صادق الحسینی الشیرازی نے فرمایا ہے کہ غربت اور بے روزگاری آج کے دور کے عالمی مسائل بن چکے ہیں، جن کی بنیادی وجہ حکومتوں کی غفلت، نااہلی اور ناقص نظم و نسق ہے، حالانکہ ان مسائل کا حل نہایت آسان اور سادہ طریقوں سے ممکن ہے۔
سلسلہ وار علمی نشست "نورِ علم” کے تحت ایک خطاب میں، جس کا عنوان تھا "آج کے عالمی مسائل اور بحرانوں کا حل”, آپ نے زور دے کر فرمایا کہ حکومتوں کا اصل فریضہ عوام کی زندگیوں کو منظم کرنا اور ان کے معاملات کی درست رہنمائی کرنا ہے۔ لیکن افسوس کے ساتھ کہنا پڑتا ہے کہ اکثر حکومتیں اپنے طرزِ عمل سے یوں ظاہر کرتی ہیں جیسے وہ ریاست اور اس کے تمام وسائل کی مالک ہوں، جس کے نتیجے میں بے روزگاری میں اضافہ ہو رہا ہے اور معیشتی بحران شدید تر ہوتے جا رہے ہیں۔
آپ نے فرمایا کہ ان مسائل کا پائیدار حل صرف اس صورت میں ممکن ہے کہ ہم خاتم النبیین حضرت محمد مصطفیٰ صلی اللہ علیہ وآلہ اور حضرت امام علی علیہ السلام کے نقش قدم پر چلیں۔ آپ نے ارشاد فرمایا:
"اگر دنیا، خصوصاً اسلامی ممالک، رسولِ خدا صلی اللہ علیہ وآلہ کی تعلیمات اور خداوند متعال کے مقرر کردہ قوانین پر مکمل طور پر عمل پیرا ہو جائیں، تو آج کے بیشتر بحران، خاص طور پر مسلم دنیا میں، بڑی حد تک ختم ہو سکتے ہیں۔”
آیت اللہ العظمیٰ نے ایک بار پھر اسلامی حکومتوں کو مخاطب کرتے ہوئے تاکید کی کہ وہ پیغمبر اسلام صلی اللہ علیہ وآلہ اور حضرت امام علی علیہ السلام کی عادلانہ اسلامی حکومت کو اپنا نمونہ بنائیں تاکہ ریاستی نظام کو بہتر بنایا جا سکے اور سماجی و معاشی انصاف کا قیام ممکن ہو۔
