واشنگٹن/ریاض ؛ امریکی صدر ڈونلڈ ٹرمپ اپنی دوسری انتظامیہ کا پہلا بیرونی دورہ مشرقِ وسطیٰ سے شروع کر رہے ہیں، جس کا مقصد خطے سے بڑے تجارتی معاہدات اور سرمایہ کاری کو یقینی بنانا ہے۔ میڈیا رپورٹس کے مطابق، ٹرمپ سعودی عرب، قطر اور متحدہ عرب امارات کا دورہ کریں گے، جہاں اسرائیل-غزہ جنگ، یمن تنازع اور ایران کے جوہری پروگرام جیسے اہم مسائل پر بات چیت ہوگی۔
ٹرمپ کی "امریکا فرسٹ” پالیسی کے تحت خلیجی ممالک سے امریکہ میں سرمایہ کاری کو فروغ دینا ایک بڑا ہدف ہے۔ انہوں نے پہلے ہی سعودی عرب سے امریکی معیشت میں 1 ٹریلین ڈالر کی سرمایہ کاری کا اعلان کیا ہے اور مزید معاہدوں کی توقع کی جا رہی ہے۔
رپورٹس کے مطابق، خلیجی رہنما بھی امریکہ سے جدید ٹیکنالوجی، جیسے سیمیکنڈکٹرز اور جوہری ڈھانچے تک رسائی حاصل کرنا چاہتے ہیں۔ تجزیہ کاروں کا کہنا ہے کہ ٹرمپ انتظامیہ کا خطے کے لیے واضح پالیسی فریم ورک نہیں ہے اور وہ طویل مدتی سفارت کاری کے بجائے فوری معاشی فوائد پر زیادہ توجہ دے سکتی ہے، خاص طور پر جب امریکہ کی توجہ چین اور بحرِ ہند و پیسفک کی طرف منتقل ہو رہی ہے۔
