برطانیہ کی 40 فیصد جامعات مالی بحران کا شکار

انگلینڈ کی 40 فیصد سے زائد یونیورسٹیاں مالی بحران کا شکار  ہوگئی ہیں، آفس فار اسٹوڈنٹس کی رپورٹ کے مطابق ملک کی 43 فیصد یونیورسٹیاں رواں سال موسم گرما تک مالی خسارے میں جانے کی توقع رکھتی ہیں۔  اس پریشان کن انکشاف نے تعلیمی شعبے میں گہری تشویش پیدا کر دی ہے،رپورٹ میں بتایا گیا ہے کہ مجموعی طور پر 270 میں سے 117 یونیورسٹیاں اخراجات میں کمی کےلیے کورسز بند کر رہی ہیں، ملازمتیں ختم اور عمارتیں فروخت کر رہی ہیں۔ 

 تاہم نگران ادارے کا کہنا ہے کہ موجودہ حالات سے نکلنے کے لیے "بنیادی اصلاحات اور مؤثر اقدامات” ناگزیر ہیں۔ یہ بحران مسلسل تیسرے سال شدت اختیار کر رہا ہے۔ اس کی بنیادی وجہ بین الاقوامی طلبہ کی تعداد میں نمایاں کمی ہے، خاص طور پر جنوری 2024 میں ویزا پالیسی میں کی گئی تبدیلیوں کے بعد یہ صورتحال پیدا ہوئی ہے، بین الاقوامی طلبہ کی تعداد میں گزشتہ سال توقع کے برخلاف تقریباً 16 فیصد کمی واقع ہوئی۔