آزادی صحافت بنیادی حقوق میں سے ہے اس پر کوئی قدغن نہیں لگائی جا سکتی: علامہ سید ساجد نقوی

قائد ملت جعفریہ پاکستان علامہ سید ساجد علی نقوی نے 3 مئی "یوم آزادیٔ صحافت” کے عالمی دن کے موقع پر جاری ایک پیغام میں کہا: صحافت ایک اہم ذمہ داری ہے جس کاہدف عوام کی رہنمائی کرنا، لوگوں تک درست حقائق اور سچ پہنچانا ہے اور ہر قسم کے تعصبات، بے جا طرف داری اور ہر قسم کی جانبداری سے مبرا ہوتے ہوئے تمام معلومات فراہم کرنا ہے۔

انہوں نے مزید کہا: دنیا بھر میں آزادی صحافت کیلئے صحافیوں کی قربانیاں بہت زیادہ ہیں۔ اس دن کو منانے کا مقصد عالمی سطح پر صحافتی آزادی کی اہمیت کو اجاگر کرنے کے ساتھ ساتھ ایسے اقدامات کا حصول بھی ہے جس میں آزادی صحافت میں پیش آنے والی مشکلات اور رکاوٹوں کا سدباب بھی کیا جا سکے۔

قائد ملت جعفریہ نے پاکستان سمیت دنیا بھر کے صحافیوں خصوصاً فلسطین و غزہ میں جانبحق ہونیوالے صحافیوں کا تذکرہ کرتے ہوئے کہا: فلسطینی صحافیوں نے جانوں کی پرواہ کئے بغیر جس طرح مظلوموں کی آواز کو دنیا تک پہنچایا اور رائے عامہ ہموار کی وہ خدمات تادیر یاد رکھی جائیں گی۔

علامہ سید ساجد علی نقوی نے مزید کہا: آزادی صحافت بنیادی حقوق میں سے ہے اس پر کوئی قدغن نہیں لگائی جا سکتی اور نہ ہی لگانی چاہیے۔ آج صحافت کا عالمی دن منانے کا مقصد اور حقیقی تقاضا یہی ہے کہ صحافتی برادری کو صحافی ذمہ داریاں ادا کرنے میں آزادی حاصل ہو، ان کے جائز حقوق کا تحفظ ہو۔ آج پرنٹ میڈیا اور الیکٹرونک میڈیا کا کردار جس اہمیت کا حامل ہے اسے کسی صورت فراموش یا کم نہیں کیا جا سکتا، مشکل حالات میں صحافیوں کا کردار قابل تحسین ہے جو اپنی جانوں کی پرواہ کئے بغیر سچ کو عوام کے سامنے لانے کیلئے میدان عمل میں موجود ہیں۔

انہوں نے کہا: صحافت کو انسانی زندگی کو بامقصد بنانے میں کردار ادا کرنے کے لئے اخلاقیات کو اجاگر کرنے اور پھیلانے میں پوری توانائیاں صرف کرنی چاہئیں چونکہ یہ انسانیت کی بہت بڑی خدمت ہے۔