انادولو ایجنسی کے مطابق، ایک طاقتور طوفانی نظام اس ہفتے کے آخر تک 7 کروڑ 50 لاکھ سے زائد امریکیوں کو متاثر کر سکتا ہے، جس کے نتیجے میں تیز ہوائیں، ژالہ باری اور طوفان کے امکانات پیدا ہو گئے ہیں۔ جنوبی میدانوں میں شدید گرج چمک کے طوفان پہلے ہی بننا شروع ہو چکے ہیں، خاص طور پر اوکلاہوما سٹی اور ڈیلاس (ٹیکساس) کے قریب۔
حکام کے مطابق، طوفان کے دوران سب سے بڑا خطرہ بڑے اولے اور تیز جھکڑ ہیں، جبکہ اوکلاہوما کے زیادہ تر علاقوں کے لیے ہفتے کی رات 1 بجے تک (جی ایم ٹی 0600) طوفانی بگولے (ٹورنیڈو) کی وارننگ جاری کر دی گئی ہے۔ ریاست لوزیانا کے شہر بیٹن روج میں موسلا دھار بارش کے بعد اچانک سیلاب کی وارننگ جاری کی گئی ہے، جہاں اب تک 11.4 سینٹی میٹر (4.5 انچ) بارش ریکارڈ کی جا چکی ہے۔
اتوار تک، طوفان کا دائرہ وسط مغربی اور جنوبی علاقوں تک پھیلنے کی توقع ہے، جہاں سب سے زیادہ خطرہ مشرقی آرکنساس، مغربی ٹینیسی، کینٹکی اور جنوبی انڈیانا میں ہوگا۔ میمفس، نیش وِل اور لوئی ول جیسے شہر شدید موسمی حالات سے متاثر ہو سکتے ہیں۔
پیر تک، یہ طوفانی نظام مشرقی ساحل تک پہنچنے کا امکان ہے، جس سے اپر نیویارک سے لے کر ٹلہاسی (فلوریڈا) تک کے علاقے متاثر ہو سکتے ہیں۔ اس کے علاوہ، ڈکوٹاز سے نیو انگلینڈ تک برف اور برفانی طوفان کی پیش گوئی کی گئی ہے، جبکہ وسکونسن اور مشی گن میں برفانی طوفان کی وارننگ جاری کر دی گئی ہے۔
