پاراچنار عمائدین کی محمود خان اچکزئی اور صاحبزادہ حامد رضا سے اہم ملاقات

اس ملاقات میں پاراچنار کی موجودہ صورتحال پر تشویش کا اظہار کرتے ہوئے فیصلہ کیا گیا کہ تحریکِ تحفظ آئین کے ایجنڈے میں اس مسئلے کو بھرپور طریقے سے اٹھایا جائے گا، اس کے علاوہ خیبر پختونخوا اور بلوچستان کے دیگر مسائل کے ساتھ ضلع کرم کی مشکلات پر بھی آواز بلند کرنے کا عزم ظاہر کیا گیا

پاراچنار کے عمائدین نے تحریکِ تحفظ آئین پاکستان کے سربراہ محمود خان اچکزئی سے ان کی رہائش گاہ پر اہم ملاقات کی۔ اس موقع پر سنی تحریک کے سربراہ صاحبزادہ حامد رضا، مجلس وحدت مسلمین کے جنرل سیکرٹری سید ناصر عباس شیرازی، مجلس وحدت مسلمین کے پارلیمانی لیڈر ایم این اے انجینئر حمید حسین، تحریکِ تحفظ آئین پاکستان کے ترجمان حسین اخونزادہ، ارشاد حسین بنگش، کرم یکجہتی کونسل کے رہنما ناصر حسین، مجلس وحدت مسلمین پاراچنار کے رہنما شفق حسین، اقرار حسین اور سید محمد بھی موجود تھے۔

اس ملاقات میں پاراچنار کی موجودہ صورتحال پر تشویش کا اظہار کرتے ہوئے فیصلہ کیا گیا کہ تحریکِ تحفظ آئین کے ایجنڈے میں اس مسئلے کو بھرپور طریقے سے اٹھایا جائے گا، اس کے علاوہ خیبر پختونخوا اور بلوچستان کے دیگر مسائل کے ساتھ ضلع کرم کی مشکلات پر بھی آواز بلند کرنے کا عزم ظاہر کیا گیا۔

وفد نے کرم میں سڑکوں کی بندش اور اس سے پیدا ہونے والی مشکلات سمیت حالیہ نقصانات پر تفصیلی بریفنگ دی، محمود خان اچکزئی اور صاحبزادہ حامد رضا نے پاراچنار کے مسائل کو ہر فورم پر اجاگر کرنے کا وعدہ کیا، جبکہ صاحبزادہ حامد رضا نے انسانی حقوق کمیٹی میں پاراچنار کے مسائل کو اٹھانے کی یقین دہانی بھی کروائی۔