مؤسسة مصباح الحسين (علیہ السلام) کی عراق میں سالانہ رمضان فوڈ باسکٹ تقسیم مہم کا آغاز

کربلاء مقدسہ میں قائم مؤسسة مصباح الحسين (علیہ السلام) نے عراق کے مختلف صوبوں میں یتیم اور مستحق خاندانوں کی مدد کے لیے اپنی سالانہ رمضان فوڈ باسکٹ تقسیم مہم کا آغاز کر دیا ہے۔

شیعہ نیوز ایجنسی ” کو موصولہ بیان کے مطابق، یہ مہم مرجعِ دینی آیت اللہ العظمیٰ سید صادق الحسینی الشیرازی کے دفتر کی براہِ راست ہدایت اور نگرانی میں انجام دی جا رہی ہے، جبکہ اس میں IHC آرگنائزیشن اور إمام الحسين (علیہ السلام) میڈیا گروپ  بھی معاونت فراہم کر رہی ہیں۔ ادارے کے مطابق، اس خیراتی منصوبے کا آغاز اس کے قیام سے ہی کیا گیا تھا اور ہر سال رمضان المبارک میں اسے انجام دیا جاتا ہے۔

بیان میں مزید کہا گیا کہ گزشتہ برسوں میں فوڈ باسکٹس کی تقسیم مختلف فلاحی تنظیموں اور خیراتی اداروں کے ذریعے کی جاتی تھی، مگر اس سال یہ کام براہِ راست ادارے کے کارکنان کے ذریعے کیا جا رہا ہے۔ اس مہم کے تحت اب تک الديوانية، الحمزة الشرقي، السماوة، الناصرية، أهوار الجبايش، البصرة، الزبير، العمارة کے علاوہ دارالحکومت بغداد کے کرخ اور رصافة علاقوں میں امدادی سامان تقسیم کیا جا چکا ہے۔

مزید برآں، مؤسسة مصباح الحسين (علیہ السلام) کے کارکنان نے رمضان المبارک سے قبل ہی غذائی اشیاء کی تیاری، ان کی پیکنگ اور مناسب مقامات پر تقسیم کے لیے انتظامات مکمل کر لیے تھے۔ ادارے کے سربراہ شيخ مصطفى محمدي نے فوڈ باسکٹس کے معیار پر خصوصی توجہ دی اور معیاری اشیاء کی فراہمی یقینی بنانے کے لیے مختلف اسٹورز اور فوڈ سپلائرز سے مسلسل رابطے میں رہے۔

ادارے نے یہ بھی واضح کیا کہ یہ تقسیم مہم رمضان کے آخری عشرے کے اختتام تک جاری رہے گی، یا پھر اس سے کچھ پہلے مکمل کر لی جائے گی، تاکہ مستحق خاندانوں کو بروقت امداد فراہم کی جا سکے۔