اترپردیش کے سنبھل میں پولیس اور انتظامیہ نے ہولی اور رمضان کے پیش نظر سخت سیکورٹی انتظامات کیے ہیں۔ 24 نومبر 2024 کے تشدد کے دوران شرپسندوں کی جانب سے برسائی گئی اینٹوں سے اب ستیہ ورت اور دیپا سرائے میں دو نئی پولیس چوکیوں کی تعمیر جاری ہے، تاکہ علاقے میں سیکورٹی کو مزید مستحکم کیا جا سکے۔
مرادآباد رینج کے ڈی آئی جی منیراج جی، ڈی ایم ڈاکٹر راجندر پنسیا اور ایس پی کرشنا بشنوئی نے حساس علاقوں میں فلیگ مارچ کیا اور شہریوں سے تہواروں کو پرامن اور ہم آہنگی کے ساتھ منانے کی اپیل کی۔ اس دوران انہوں نے واضح کیا کہ پولیس قانون پر سختی سے عمل کرے گی اور کسی کو بھی قانون ہاتھ میں لینے کی اجازت نہیں دی جائے گی۔
انتظامیہ نے دونوں برادریوں کے رہنماؤں سے ملاقات کی اور عوام سے کسی بھی نئی روایت کے آغاز سے گریز کرنے کی درخواست کی۔ ڈی آئی جی نے ہدایت دی کہ امن و امان کو برقرار رکھنے کے لیے سماج دشمن عناصر کے خلاف سخت کارروائی کی جائے گی۔
حکام نے بتایا کہ دیپا سرائے اور ہندو پورکھیڑا میں نئی پولیس چوکیوں کی تعمیر سے علاقے کی سیکورٹی مزید مضبوط ہوگی، اور پولیس کسی بھی ناخوشگوار واقعے سے نمٹنے کے لیے پوری طرح تیار ہے۔
