استنبول میں رمضان سے قبل تاریخی مساجد پر المحیا بتیاں روشن

استنبول میں صدیوں پرانی  روایت المحیا کو رمضان المبارک کی آمد پر دوبارہ زندہ کیا گیا، جس میں تاریخی مساجد کے میناروں کے درمیان روشنیاں جگمگا اٹھیں۔ آیاصوفیہ گرینڈ مسجد، ایمینو نیو مسجد اور سلیمانی مسجد سمیت دیگر مساجد میں روشنیوں سے بنے پیغامات نصب کیے گئے، تاہم سلطان احمد مسجد میں تعمیراتی کام کی وجہ سے یہ روایت معطل رہی۔

استنبول کے مفتی پروفیسر صافی ارپاگوش کے مطابق، یہ فن چند ماہر کاریگر ہی برقرار رکھے ہوئے ہیں، اور اس سال جنرل ڈائریکٹوریٹ آف فاؤنڈیشنز کے تعاون سے یہ ڈسپلے لگائے گئے۔ رمضان، قرآن اور روزے کی اہمیت اجاگر کرنے والے یہ پیغامات ترکی زبان میں روشنیوں سے تحریر کیے گئے۔ ماضی میں تیل کے لیمپ استعمال ہوتے تھے، مگر آج الیکٹرک بلب اور ایل ای ڈی لائٹس نے ان کی جگہ لے لی ہے، جو رمضان کی راتوں کی خوبصورتی میں اضافہ کرتے ہیں۔