عراق ؛ روضہ مبارک حضرت عباس علیہ السلام میں 8ویں مرکزی گریجویشن تقریب کا انعقاد
روضہ مبارک حضرت ابوالفضل العباس علیہ السلام کے سیکریٹریٹ جنرل نے جمعہ کے روز کربلا مقدسہ میں بین الحرمین کے علاقے میں 8ویں مرکزی گریجویشن تقریب کی سرگرمیوں کا آغاز کیا۔
روضہ مبارک کی سرکاری ویب سائٹ کے مطابق، اس بابرکت تقریب میں عراق سمیت مختلف اسلامی ممالک سے تعلق رکھنے والی 4,000 سے زائد خواتین فارغ التحصیل طالبات نے شرکت کی۔
روضہ مبارک حضرت عباس علیہ السلام کے سیکریٹری جنرل، سید مصطفی مرتضیٰ الضیاء الدین نے اس موقع پر کہا کہ "یہاں شرکت کرنے والی فارغ التحصیل طالبات عراقی معاشرے کے تمام طبقات کی نمائندگی کرتی ہیں، اور اس تقریب کی علامت عراقی کھجور کا درخت تھا، جو ہمارے وطن سے وابستگی اور محبت کی تجدید کا ایک اعلیٰ قومی نشان ہے۔”
انہوں نے مزید وضاحت کی کہ "عراق اور دیگر اسلامی ممالک کی خواتین گریجویٹس کے لیے منعقد کی گئی اس 8ویں مرکزی تقریب میں سات اسلامی ممالک—کویت، بحرین، عمان، لبنان، ایران، پاکستان اور سعودی عرب—سے 170 طالبات نے شرکت کی، جبکہ عراق کے مختلف علاقوں سے 4,000 سے زائد طالبات بھی اس تقریب کا حصہ بنیں۔”
