بہت سی روایات میں آیا ہے کہ رسول اکرم صلی اللہ علیہ وآلہ اور ائمہ اطہار علیہم السلام اسی طرح وضو کرتے اور نماز پڑھتے تھے: آیۃ اللہ العظمیٰ شیرازی

مرجع عالی قدر آیۃ اللہ العظمیٰ سید صادق حسینی شیرازی دام ظلہ کا روزانہ کا علمی جلسہ حسب دستور ہفتہ 16 شعبان المعظم 1446 ہجری کو منعقد ہوا۔ جس میں گذشتہ جلسات کی طرح حاضرین کے مختلف فقہی سوالات کے جوابات دیے گئے۔

آیۃ اللہ العظمیٰ شیرازی نے سورہ مائدہ کی آیت 6 کی جانب اشارہ کرتے ہوئے فرمایا: اگرچہ "الی” انتہا کے معنی میں ہے لیکن اس آیت میں غایت مغسول مراد ہے نہ کہ غایت غسل۔ یعنی ہاتھ کی انتہاء مد نظر ہے نہ کہ فعل غسل۔

آیۃ اللہ العظمیٰ شیرازی نے مزید فرمایا: یعنی ہاتھ کہ جس کی انتہا کہنی ہے، کو دھوئے۔ البتہ اس آیت مبارک میں دھونے کی کی کیفیت اور طریقہ بیان نہیں ہے۔

آیۃ اللہ العظمیٰ شیرازی نے رسول اللہ صلی اللہ علیہ وآلہ کی حدیث "کتاب اللہ و عترتی اہل بیتی” بیان کرتے ہوئے فرمایا: عترت نے فرمایا ہے کہ کہنی سے نیچے کی طرف دھویا جائے۔ لیکن عامہ جس طرح دیگر مسائل میں ہم سے اختلاف رکھتے ہیں اس مسئلہ میں بھی انہیں ہم سے اختلاف ہے۔

آیۃ اللہ العظمیٰ شیرازی نے مزید فرمایا: اگر صرف ہم اور قرآن ہوتے تو قرآن میں کہنی سے انگلیوں تک یا انگلیوں سے کہنی تک دھونے کا ذکر نہیں ہے۔ بلکہ خاصہ کی روایات میں دھونے کی کیفیت کی وضاحت ہوئی ہے۔

آیۃ اللہ العظمیٰ شیرازی نے فرمایا: بہت سی روایات میں آیا ہے کہ رسول اکرم صلی اللہ علیہ وآلہ اور ائمہ اطہار علیہم السلام اسی طرح وضو کرتے اور نماز پڑھتے تھے۔

واضح رہے کہ مرجع عالی قدر آیۃ اللہ العظمیٰ سید صادق حسینی شیرازی دام ظلہ کا روزانہ علمی جلسات آپ کے دفتر واقع ایران، قم مقدس، خیابان چہار مردان، کوچہ 6 میں ایرانی وقت کے مطابق صبح 11:15 بجے منعقد ہوتا ہے‌۔

آپ ان علمی اجلاس کو براہ راست امام حسین علیہ السلام سیٹلائٹ چینل یا فروکوئنسی 12073 پر دیکھ سکتے ہیں۔