آگرہ: ٹرانس کالونی کی ایک مسجد میں قرآن کریم کے جلے ہوئے اوراق ملنے پر علاقے میں تشویش کی لہر دوڑ گئی۔ صبح نماز کے وقت نمازیوں نے جلے ہوئے صفحات دیکھ کر امام کو اطلاع دی، جس کے بعد پولیس کو مطلع کیا گیا۔
پولیس نے واقعے کی تفتیش شروع کر دی ہے اور علاقے کی سی سی ٹی وی فوٹیج جمع کر لی گئی ہے۔ چھتہ سرکل کے اے سی پی ہیمنت کمار کے مطابق مسجد کے کچن سے ایک گیس سلنڈر بھی چوری ہوا ہے، لیکن اس واقعے کو چوری سے جوڑنا درست معلوم نہیں ہوتا۔
انڈین مسلم ڈیولپمنٹ کونسل کے صدر سمیع آغا نے اسے فرقہ وارانہ ہم آہنگی کو متاثر کرنے کی سازش قرار دیا ہے۔ انہوں نے پولیس سے مکمل تحقیقات اور ذمہ داران کے خلاف سخت کارروائی کا مطالبہ کیا۔
واضح رہے کہ آگرہ تاریخی اہمیت کا حامل شہر ہے، جہاں تاج محل اور مغلیہ دور کی دیگر یادگاریں موجود ہیں۔ ایسے واقعات سے شہر کی فرقہ وارانہ ہم آہنگی پر منفی اثرات مرتب ہو سکتے ہیں، جس کے باعث مقامی مسلم وفد نے پولیس کمشنر سے ملاقات کی تیاری کا اعلان کیا ہے۔
