جنوبی افریقہ میں اسٹل فونٹین کے سونے کی کان سے دو دن کے دوران 36 لاشیں اور 82 زندہ افراد نکالے گئے۔ حکام کے مطابق زندہ بچ جانے والے افراد پر غیر قانونی کان کنی اور امیگریشن قوانین کی خلاف ورزی کے الزامات عائد کیے گئے ہیں۔
پولیس نے اگست میں کان کا محاصرہ کیا تھا، کھانے اور پانی کی رسائی بند کرکے کان کنوں کو سطح پر لانے کی کوشش کی گئی۔ سینکڑوں مزید افراد اب بھی کان کے اندر پھنسے ہوئے ہیں، جہاں ناقص حالات میں زندہ رہنے والے افراد اور لاشوں کی ویڈیوز جاری کی گئی ہیں۔
ریسکیو آپریشن میں ایک دھاتی پنجرے کے ذریعے 2 کلومیٹر گہرائی سے لاشیں اور زندہ افراد نکالے جا رہے ہیں۔ حکومت نے غیر قانونی کان کنی کو "معیشت پر جنگ” قرار دیتے ہوئے اس کے خلاف سخت کارروائی کی ہے۔ وزیر معدنیات نے کہا کہ 2024 میں غیر قانونی دھاتوں کی تجارت کا تخمینہ 60 ارب رینڈ لگایا گیا تھا۔
یہ کانیں عموماً وہ ہوتی ہیں جو تجارتی طور پر غیر منافع بخش ہونے کی وجہ سے ترک کر دی جاتی ہیں۔ غیر قانونی کان کن، جو زیادہ تر دیگر افریقی ممالک سے آئے ہوتے ہیں، ان کانوں سے باقی بچی ہوئی دھات نکالنے کی کوشش کرتے ہیں۔
یہ کارروائی انسانی حقوق کے گروپوں کی تنقید کا نشانہ بھی بنی ہے، جنہوں نے کان کنوں کی حفاظت اور انسانی امداد کی فراہمی پر زور دیا۔
