شمالی ہندوستان میں سردی کا آغاز ہو چکا ہے، خاص طور پر دہلی، یوپی، ہریانہ، پنجاب، راجستھان اور مدھیہ پردیش کے علاقوں میں ٹھنڈ محسوس کی جا رہی ہے۔ دن کے وقت دھوپ ہونے کی وجہ سے درجہ حرارت زیادہ نہیں گرتا، لیکن محکمہ موسمیات نے پیش گوئی کی ہے کہ اگلے چند دنوں میں سردی میں اضافہ ہوگا۔
دہلی میں سنیچر کی صبح اس موسم کی سب سے سرد صبح رہی، جہاں صفدر جنگ کے علاقے میں درمیانے درجے کا کہرا ریکارڈ کیا گیا جبکہ آئی جی آئی ایئرپورٹ کے نزدیک حد نگاہ 500 میٹر تک محدود رہی۔ محکمہ موسمیات نے دہلی اور اتر پردیش سمیت کئی ریاستوں میں یلو الرٹ جاری کرتے ہوئے عوام کو گھنے کہرے اور کم حد نگاہ کے پیش نظر محتاط رہنے کی ہدایت کی ہے۔ دہلی کا اوسط درجہ حرارت آئندہ دنوں میں 13 ڈگری سیلسیس تک گر سکتا ہے۔
اتر پردیش کے مختلف اضلاع، جیسے علی گڑھ، بریلی، مراد آباد، مؤ اور سیتاپور میں بھی سردی کی شدت میں اضافہ متوقع ہے، جہاں 18 نومبر سے درجہ حرارت مزید کم ہونے کی امید ہے۔ ماہرین اور ڈاکٹروں نے شہریوں کو احتیاطی تدابیر اختیار کرنے کی تاکید کی ہے، خاص طور پر صبح اور رات کے اوقات میں گرم کپڑے پہننے کی ہدایت دی گئی ہے۔
ادھر، کیرالا میں مسلسل بارش کا سلسلہ جاری ہے۔ محکمہ موسمیات نے کیرالا میں آج بھی شدید بارش کا الرٹ جاری کیا ہے، جہاں روزانہ ہونے والی بارش سے معمولات زندگی متاثر ہو رہے ہیں۔ شمالی ہندوستان میں سردی کی شدت اور جنوبی علاقوں میں بارشوں نے لوگوں کو چوکنا کر دیا ہے۔
