ملائیشیا کے وزیر اعظم 3 روزہ سرکاری دورے پر پاکستان پہنچ گئے 

  ملائیشیا کے وزیر اعظم داتو سیری انور ابراہیم اپنے تین روزہ دورے پر پاکستان پہنچے تو نور خان ایئربیس پر وزیر اعظم شہباز شریف نے ان کا پرتپاک استقبال کیا۔

اسلام آباد پہنچنے پر پاک فوج کے چاق و چوبند دستے نے ملائیشیا کے وزیر اعظم کو سلامی دی جبکہ اس موقع پر انہیں 21 توپوں کی سلامی بھی پیش کی گئی، اس موقع پر روایتی لباس میں ملبوس بچوں نے ملائیشیا کے وزیر اعظم کو پھول پیش کیے۔

نور خان ایئر بیس پر شہباز شریف کے ہمراہ نائب وزیر اعظم و وزیر خارجہ اسحٰق ڈار، وزیر کامرس جام کمال خان اور وزیر اطلاعات و نشریات عطااللہ تارڑ بھی استقبال کے لیے موجود تھے۔

ملائیشیا کے وزیراعظم داتو سیری انور ابراہیم دورے کے دوران وزیر اعظم شہباز شریف کے ساتھ ساتھ صدر مملکت آصف علی زرداری سے بھی ملاقات کریں گے۔

دورے کے دوران پاکستان ملائیشیا دو طرفہ تعاون کے فروغ پر گفتگو اور دونوں ممالک کے مابین شراکت کے حوالے سے اہم پیشرفت متوقع ہے۔

ملائیشیا کے وزیر اعظم کے ہمراہ اعلیٰ سطح کا کاروباری شخصیات و سرمایہ کاروں کا وفد بھی پاکستان آیا ہے اور وفد پاکستانی کاروباری شخصیات و سرمایہ کاروں سے ملاقات کرے گا جس سے دونوں ممالک کے مابین تجارت و سرمایہ کاری کو فروغ ملے گا۔

دونوں ممالک کے مابین تجارت و سرمایہ کاری میں تعاون کے لیے ملائیشیا کے وزیراعظم پاکستان۔ملائیشیا بزنس فورم میں شرکت بھی کریں گے۔