عارضی داخلہ دستاویز کی مدت ختم، طورخم بارڈر پر ٹرکوں کی آمدورفت رکنے سے تجارت بند

عارضی داخلہ دستاویز کی وجہ سے پاک افغان سرحد پر طورخم کے مقام پر مال بردار ٹرکوں کی آمدورفت روک دی گئی ہے جس کی وجہ سے سرحد پر تجارت بند ہو گئی ہے۔

خیبر پختونخوا کے لیے پاکستان افغانستان جوائنٹ چیمبر آف کامرس اینڈ انڈسٹری کے کوآرڈینیٹر ضیاالحق سرحدی نے ڈان ڈاٹ کام کو بتایا کہ افغان ٹرک ڈرائیوروں کے لیے عارضی داخلہ دستاویز حاصل کرنے کے لیے 31 جولائی کی ڈیڈ لائن بدھ کی رات ختم ہو گئی۔

ضیاالحق سرحدی نے بتایا کہ پاکستان نے افغان ڈرائیوروں کو عارضی داخلہ دستاویز حاصل کرنے کے لیے 15 جولائی تک کا وقت دیا تھا اور پھر افغانستان کی درخواست پر اس میں 31 جولائی تک کی توسیع کردی گئی تھی۔

انہوں نے کہا کہ افغان حکام نے پاکستان سے کہا ہے کہ وہ ان ڈرائیوروں کو یکم اگست 2024 سے سرحد پار کرنے کی اجازت نہ دیں جن کے پاس ابھی تک عارضی داخلہ دستاویز نہیں ہے۔

ان کا کہنا تھا کہ لیکن جب پاکستان نے فیصلے پر عمل درآمد شروع کیا اور ان افغان ڈرائیوروں کو روک دیا جن کے پاس دستاویز نہیں تھی لیکن اس کے جواب میں افغانستان نے بھی پاکستانی ٹرکوں کو افغانستان میں داخل ہونے سے روک دیا۔

افغانستان کی وزارت تجارت کے ترجمان عبدالسلام جواد نے بھی طورخم کو مال بردار ٹرکوں کے لیے بند کرنے کی تصدیق کی ہے۔