پیرس میں اولمپکس کی افتتاحی تقریب سے قبل یہاں کی تیز رفتار ٹرین سروسیز پر حملہ کیا گیا۔ یہ صرف سائبر حملہ نہیں تھا۔ متعدد مقامات پر املاک کو نقصان بھی پہنچایا گیا۔فرانسیسی حکام اسے مجرمامہ افعال اور ماحول خراب کرنے کی کوشش قرار دے رہے ہیں۔ یہ ریل نیٹ ورک پیرس کو لندن، انگلش چینل اور بلجیم سے جوڑتا ہے۔ یہی نہیں شہر بھر میں اس کی پٹریوں کا مستحکم نیٹ ورک ہے۔
پیرس پولیس کے سربراہ نے اعلان کیا ہے کہ ایس این سی ایف ریلوے لائنس پر راتوں رات ہونے والے حملوں کے بعد پیرس کے ٹرین اسٹیشنوں پر سیکوریٹی بڑھانے کیلئے مزید فورس تعینات کی جائے گی۔ لارینٹ نونیز نے براڈکاسٹر فرانس کو بتایا کہ جمعہ کو مزید پولیس فورس کو پیرس کے تمام اسٹیشنوں پر بھیج دیا گیا ہے کیونکہ شدید رکاوٹوں کے بعد ان علاقوں میں لوگ بھیڑ میں گئے ہیں۔ اس سے قبل فرانسیسی ریلوے کمپنی ایس این سی ایف نے کہا تھا کہ پیرس اولمپکس کی افتتاحی تقریب سے قبل رات بھر اس کی ریل لائنس میں توڑ پھوڑ کی گئی۔
