همزمان با نزدیک شدن به مهلت تعیین شده پاکستان مبنی بر اخراج اجباری بیش از یک میلیون مهاجر غیرقانونی، گزارش‌ها می‌رساند که پلیس این کشور فشار علیه مهاجرین افغانستان را بیشتر کرده است.
براساس گزارش‌ها، پلیس پاکستان جست‌وجوی خانه به خانه مهاجران افغانستانی را شروع کرده و شبانه وارد خانه‌ها می‌شوند و آن‌ها را به زندان می‌برند. مهاجرین افغانستان که اکثرا از ترس طالبان به پاکستان فرار کرده اند، می‌گویند نظامیان پاکستانی به بهانه‌های مختلف آنان را بازداشت کرده و مجبور به ترک این کشور می‌کنند.
مهاجران افغان در پاکستان می‌گویند سیاست جدید دولت پاکستان در قبال پناهجویان و مهاجران، زندگی را برای آن‌ها دشوار کرده است. دولت پاکستان به تمام مهاجرانی که آن‌ها را «غیرقانونی» می‌داند، تا اول نوامبر سال جاری میلادی فرصت داده است تا این کشور را ترک کنند.
وزارت کشور پاکستان گفته که دارایی مهاجران غیرقانونی پس از پایان مهلت تعیین شده برای خروج، مصادره خواهد شد. نهادهای بین‌المللی و حقوق بشر از این اقدام پاکستان انتقاد کرده اند.
کارشناسان حقوق بشر سازمان ملل ۲۵ میزان – مهر ماه از پاکستان خواستند تا از اخراج افغانستانی‌ها خودداری کند. از سوی دیگر، گفته می‌شود بیش از هزار مهاجر افغانستانی که در میان آنان افراد دارای مدارک قانونی نیز می‌باشند در زندان‌های ایالت سند این کشور در بازداشت به سر می‌برند.
